يوميات ستات نكديه

في الصباح الباكر استيقظ "مكرم" من نومه ـ وعلي غير العاده ـ علي صراخ زوجته "نجوان" ـ المجنونه بنت المجانين ـ كما ناداها حين سمع صراخها ..
ماذا حدث يا موزبلحه يا بنت الموزبلحين .. هل جننت يا امرأه لماذا تصرخين هكذا ع الصبح ؟؟
"بيهزر سعادته فاكرها بتعمل كده علشان تصحيه "
وهي ولا بترد عليه ابدا ودائمه في بكائها المصاحب له صراخ وعويل ولا عويل الذئب ياخواتي ..

مكرم : ماذا بك يا حبي .. هل ربنا ريحنا وماتت امك ؟؟
نجوان : آآآآآآه إهي إهي إهي
مكرم : مقاعها في بكائها .. حمدا لله والله ياشيخه اهي ارتاحت وريحت بردو
نجوان : يخرب بيت ابوك بد الشر علي مامتي مش ماتت ده انا بعيط ع اللي انا فيه
مكرم : وايه بقي ياست هانم اللي انتي فيه خلصيني انا عاوز افطر وانزل الشغل
نجوان : آآآآآآه إهي إهي إهي
مكرم : يخرب بيت اللي يزعلك قوليلي مين بس اللي مدايقك ع الصبح كده وانا انزل اموت امه
علشان صحاني من النوم علي صويت اهلك ده
نجوان : انا هقولك بقي وامري لله
مكرم : ايه خير قلقتيني ... قولي بقي وخلصيني قرفتيني
نجوان : انا هقولك بس الاول قولي انك مش هتزعل
مكرم : وانتي مالك ازعل ولا حتي اموت خلصيني مش فايقلك ع الصبح
نجوان : آآآآآآه إهي إهي إهي
مكرم : خلاص يا روحي حقك عليا انا اسف انا ابن كلب علشان قاطعتك قولي بقي
نجوان : بس انت هتزعل
مكرم : يخرب بيت اهلك
نجوان : مش قولتلك هتزعل
مكرم : وهو انتي لسه قولتي حاجه
نجوان : خلاص انا هقول اهو
مكرم : يلا ياروحي بقي علشان انا مسعجل ولسه عاوز افطر قبل ما انزل الشغل
نجوان : مكرم حبيبي ... انت عارف ان انا كنت نايمه جمبك
مكرم : احنا هنهزر ... بقولك مستعجل تقوليلي كنت نايمه .. خلصيني بسرعه لحسان وحياه الغاليه امك
اسيبك وامشي
نجوان : انا حلمت النهارده ياحبيبي ان احنا روحنا نصيف زي كل سنه
مكرم : يقاطعها .. انشاء الله ياحبيبتي هحاول اظبط شغلي ونطلع اسبوع ونصيف زي كل سنه بس
من غير الست والدتك علي عيني والله ...
نجوان : آآآآآآه إهي إهي إهي
مكرم : ايــــــــــــــه اللي حصل ما انتي كنتي كويسه
نجوان : ما انا لسه مش كملتلك اللي حصل
مكرم : كملي يا حبي بس اختصري شويه بلاش تعملي زي الست امك وتحكي من ساعه ما كنا
بنجهز الشنط للسفر
نجوان : إهي إهي إهي .. بص يا مكرم يا حبيبي احنا كنا هنسافر بالعربيه الجديده وبعدين علشان
انت لسه مش رخصتها فقولت نسافر بعربيتي القديمه
مكرم : حبيبتي اقوم اخد شاور لحد ما توصلي بينا عند الشاليه
نجوان : المهم يا سيدي كنت انت سايق وفي وسط الصحراوي والعربيه عطلت روحت انت ركنتها
وجيبتلنا اتوبيس وبعد ما مشينا بالاتوبيس راح اتقلب بينا وعمل حادثه جامده بس الحمد لله
مافيش حد مات بس انت ياحبيبي كنت مصاب جامد اوي ومتخرشم
مكرم : وانتي كان لازم يعني تحكيلي ع الصبح كده قبل ما اروح الشغل .. طيب كنتي استني لحد
بعد الغدا ع الاقل .. كملي يا وش السعد والهنا
نجوان : المهم يا حبيبي ان انت قولتلي لازم تروحي المصيف علشان انتي طول السنه مش بترتاحي
ودي اجازتك ولازم تتهني بيها
مكرم : !!!! ده انا قولت كده ؟؟ وكنت بقولك انتي !!!!! ؟؟ .. طيب كملي كملي
نجوان : ايوه طبعا يا حبيبي .. سيبني اكملك بقي اللي حصل
مكرم : اتفضلي ياختي كملي
نجوان : انا بقي روحت المصيف وطبعا كنت مدايقه اني سيبتك لوحدك وانت تعبان كده وبين الحياه والموت
وانا سايباك وبصيف ومبسوطه
مكرم : يا حنينه .. انا عارف والله مش محتاج جد يقولي
نجوان : المهم في يوم وانا قاعده ع الشيزلونج وباخد حمام شمس لاقيتك جاي وانت لسه اثار الحادثه فيك
وبتقولي وحشتيني اوي وشوفتني زعلانه .. قولتلي مالك زعلانه كده ليه ما انا كويس اهو
ولاقيتك بتقولي ما تيجي ننزل الميه شويه .. وفجأه ياخويا واحنا نازلين خير اللهم اجعله خير
شوفنا ولد صغير بيغرق وانت جريت علشان تنقذه .. وانت لما روحت وانقذته بقي
حدفته ناحيه الشاطئ كده وزي مايكون فيه حاجه بتشدك انت بداله وفجأه اختفيت
مكرم : هو احنا كنا متخانقين ولا انتي زعلانه من حاجه .. ده انتي في الحلم عاوزه تموتيني بالعافيه باي طريقه
مره حادثه ومره العربيه تعطل ومره تقوليلي هغرق .. كملي لما نشوف اخر الحلم ده ايه
نجوان : ما انا بقولك بقي لما انت اختفيت في البحر انا بقي قعدت زعلانه علشانك
وبعد يومين لاقيت ناس جايين يقولولي العمر الطويل ليكي في الاول مش فهمت بس بعد كده
عرفت انك ياحبيبي بعد الشر عليك يعني ده في الحلم يعني انت .......
مكرم : الله يرحمني كان نفسي اصيف معاكي والله بس مافيش نصيب بقي .. المهم تكوني انبسطتي بالمصيف
نجوان : مستحيل ياحبيبي من غيرك مافيش اي حاجه ليها طعم
مكرم : خلاص الحلم خلص وانا بقي ربنا يرحمني .. طيب مش عارفه العزاء امتي علشان ابقي اروح واجب بردو ..
خلصيني ع الصبح عاوز اروح الشغل
نجوان : مش كنت عاوز تفطر الاول يا حبيبي قبل ما تنزل الشغل
مكرم : وهو في اكل بعد اللي انتي قولتيه ده
نجوان : يا حبيبي ده حلم وبعدين انا لسه مش كملتلك ايه اللي حصل بقي بعد ما انا رجعت البيت لما قالولي
انك بعد الشر عليك يعني ....
مكرم : ها .... حصل ايه ...
نجوان : وانا جايه ع البيت كده شوفت "مروان" اخوك قاد في العربيه الجديده ومعاه مامتك و "مروه" اختك
وخارجين بالربيه الجديده .. انا طبعا كنت مدايقه اوي روحت مزعقه فيهم .. وانتوا ازاي تخرجوا
بالعربيه دي و"مكرم" مش موجود .. راح "مروان" اخوك رد عليا ببرود كده وقالي دي عربيتي
و "مكرم" جابهالي علشان نجحت وهخرج بيها مع مامتي واختي .. انا طبا زعلت اوي علشان بيقولي انك
جيبتله هو العربيه الجديده وهيخرج بيها وانت مش موجود معانا ....
مكرم : وانتي بقي عاوزه ايه دلوقتي .. يعني انا المفروض اعمل ايه
نجوان : ماليش دعوه انا عاوزه عربيه جديده زي ما انت جيبت "لمروان"
مكرم : يخرب بيت اهلك .... وهو انا جيبتله حاجه يا بنت المجانين انتي
نجوان : اه امال العربيه اللي تحت دي ايه ؟؟ واللي انا شوفته في الحلم ده ايه ؟؟ ولا هو "مروان" احسن
مني يعني ده انا حتي مراتك
مكرم : اه يا بنت المجانين .. يعني كمان مش فارقه معاكي هموت ولا لا المهم العربيه .. الله يخرب بيتك
انا نازل الشغل احسن
نجوان : ايه ياحبيبي طيب مش هتفطر قبل ما تنزل ؟؟
مكرم : مش هتزفت قبل ما اتنيل مش عاوز حاجه

وقام "مكرم" وهو مش طايق نفسه ولا مراته وراح نازل ومن غير فطار وطبعا متأخر وعم "دسوقي" السواق قاعد مستني جنابه من الصبح تحت في العربيه لحد ما اتخنق هو كمان وهو اصلا جاي مش طايق نفسه علشان الست هانم "فوزيه" مراته منكده عليه عيشته هيا كمان ع الصبح ......


استنوا حكايه عم "دسوقي" و الست هانم "فوزيه" مراته

وطبعا ماتنسوش تقولوا رايكوا لو عجبتكوا وحتي لو مش عاجباكوا

اه قريب ان شاء الله
ومشكور على المرور

tslam edeky ya amar

مشكورة على المرور